Mat 4 | GAM | STEP | Kune ge God Murble wo Satan Jisas kamale tonda dje pille une Jisas dje i er dumo wapra yei al pi.

Matthew 4

Satan Jisas kamale toi

(Mak 1.12-13 ne, Luk 4.1-13)

1 Kune ge God Murble wo Satan Jisas kamale tonda dje pille une Jisas dje i er dumo wapra yei al pi. 2 Po moika imina ne, armina ege 4-pela ten wor pika, Jisas kwa nanoi, koll golo moi. 3 Moika Satan wo Jisas kamale to embe dji, ni God warye kaima mon dal, ku kiwa ge djimbenka wor bret kul pundambe dji. 4 Ba Jisas embe dji, God kandjiye bolo wori paro ge embe djindo, nono mormon ge kwa eri no namopon, God kandja porapora djindo mal ge nambon we dji. 5 Djika Jerusalem God dumoye yei al Satan wo Jisas ipo lotu numb kerman kam kona plakill kaima yei al be to wori moika 6 Satan embe dji, ni God wariye kaima mon dal, plo dje er kal piye! dji. God kandjiye bolo wori paro ge embe djindo, une tau agelo dje wordaka wo ni amblo ineke, ni kaken al ku ta nabopen we dji. 7 Dji ba, Jisas embe dji, God kandjiye ta bolo wori paro ge embe djindo, God Iwa Kerman moro ge une yembe paro mo naparo dje ye su nayeme! dji. 8 Djika Satan Jisas dje ipo kamkimb kona pla kaima yei al wori moika, dumo kerman porapora yei ge ne, kog mogoi kerman yei ge, une porapora ombine dje awo 9 embe dji, ni kaken gopye boglo na kandjina amblo pla worin dal, wal wopake porapora kanden ge na ni auno we dji. 10 Dji ba, Jisas embe dji, Satan, ni er piye! God kandjiye bolo wori paro ge embe djindo, ye kakene gopyene boglo una ta kandjine amblo pla woro naume! dji. Iwa Kerman God taimane moro ge kandjiye amblo pla worme! dji. 11 Djika Satan kere er pika, tau agelo kambono wo Jisas amblo pille dje awi.

Jisas distrik Galili molo kogo kindja yeno dje yei

(Mak 1.14-15 ne, Luk 4.14-15)

12 Jon i kaye numb wori pai we djimaka, Jisas pille er distrik Galili pi. 13 Po dumo Nasaret kere, er dumo Kaperneam nu erim Galili djeke yei al po moi. Dumo Kaperneam yei ge epil Sebulun ne, Naptali dumene yei we dji. 14 Une po moi ge propet Aisaia asa pepa bolo pagi ge megiye toi. Aisaia embe dji, 15 dumo Sebulun una mor ge ne, dumo Naptali una mor ge nu erim kerman kondwe yei al molo, nu Jodan konato mor una ge ne, distrik Galili epil djell una ^{▼▼Epil djell una we dje bolo wori pai ge, kandja tok pisin al ge ol manmeri bilong ol arapela kantri we djine. Alla kandja tok Iglis pai ge gentiles we djine. Epil djell una kandja me ge, Juda una ge God unakye kaima moi, alla epil djell una ge man. Juda una nalene al ge yenekne God unakye moi, epil djell una ge man. Papua New Guinea una mor ge epil djell una mor. America una mor ge para epil djell una mor.} merke mor ge, 16 emill yei al ami dje moi una au kerman ta dji kani. Una nomane goi mal yei moi ge, au ta dji kani we dji.

Iwa 4-pela Jisas pi al aike er pi

(Mak 1.16-20 ne, Luk 5.11)

17 Kune ge Jisas kandja kindja dje una awo embe dji, God dumoye wopake kantau yenda we dji ge egeye ipon yero, ye nomane ake tome! dji.

18 Dje kere er dumo Galili nu erim djeke yei al po kani, Saimon age Andru boll pis kon i nu al woro mopill. Soka pis to, maket yeye yepill una mopill. 19 Mopillka Jisas embe dji, ye na wondo al er wose! Na ye una dje imbell mal ombine dje auno we dji. 20 Djika soka ola dje kon kere, Jisas pi al aike er pupill.

21 Jisas er wekle po kani, iwa Sebedi wariye Jems age Jon boll, kanu al yenekne nane boll pakna molo pis kon tup dji amblo wopake ye molmaka, Jisas embe dji, ye soka er wose! dji. 22 Djika soka nane Sebedi kere Jisas pi al aike er pi.

Una merke ke toi moi Jisas wo i gun woro awi

23 Distrik Galili dumo kerker pakna yei al Jisas po molo, lotu numb yei al God dumoye wopake kandjiyembe wopake ^{▼▼Kandjambe wopake we dje bolo wori pai ge, kandja tok pisin al ge, gutnius we djine. Gutnuis we dji ge me embe mal pai. Ge kandja wopake, kandja ke man. Jisas nono singare ke yepin mal kere aunda we dje bolo wori pai ge, kandja wopake pai, kandja ke napai.} pai ge dje awo, una ke toi moi una ne, gaklene ke yei una aike, une i gun woro awi. 24 Awika una moi ge kane kandjambe tomaka, propins Siria una pille, yenekne ke kayekaye pai una iwi. Gaklene ngembill ye pai una ne, kum ke pai una ^{▼▼Kum ke pai una we dje kandja embe bolo wori pai ge, kandja tok pisin al ge spirit nogut we djimon. Baibel al paro ge kum ke pai una moi ge, Satan dje worika yene kum ke wombaye moi ge po una ye ke ye awi. Satan ge kum ke ngambalne yembe moro. Une kandja djinda mal ga kum ke mor ge po kogo yene. Una Jimi una kum ke kulo molo dje worinjka po una ye ke ye awinj. Jimi una ye molo yenekne agane abane kum to ye ke ye awinj. Ba Baibel al paro ge, una makimb una ta ye molo kum to una djell ye ke ye nawinj. Satan ge, dje wordaka, yene wombaye kum ke ge po una ye ke ye aune. Satan yendo, una nayenj. Alla Baibel al paro ge, kum ke pai una ge, ga wandill mal moi. Satan wo toi una moi. Ke kayekaye pai, wopake namoi una moi. Jimi una moye al ge, una ta kum panda, una wo tane, kot ye awo embe yene. Ba Baibel al paro ge kum ke pai una moi ge, Satan wo toi una moi, wandill mal mor.} ne, kiku toi una ne, kakene aglene goi una porapora iumaka, Jisas i gun woro awi. 25 Una merke distrik Galili ne, Dekapolis una ne, Jerusalem una ne, dumo Judia una ne, nu Jodan konato moi una ge Jisas boll aike wani.